مواصفات الزوجة التي أرغب الإرتباط بها : معظم الناس اللي بتدور علي شريك حياتها بيكون عندهم مواصفات معينة بيتمنو انهم يلاقوها ف الانسان ده، ولكن مع مرور الوقت واثناء رحلة البحث بيلاقو نفسهم اتكعبلو فاجأة ف مطب غير مرئي اسمه الحب، هو الحقيقة مش مطب صناعي زي مااتعودنا بس تقدرو تعتبروه مطب طبيعي لانه شيء معنوي محسوس، خلونا نتفق مبدئيا ان الحب موجود بالفعل واللي ينكر وجوده لمجرد انه مصدفهوش او معشهوش لحد دلوقتي او لمجرد تجربة غير موفقه مر بيها فاعتقد انه محتاج يعيد تفكيره، عندنا ايات كتير في القران الكريم والاحاديث النبوية الشريفة بتشير لكلمة حب واكيد في جميع الكتب السماوية الاخري، علي سبيل المثال يقول المولي عز وجل في كتابه الكريم (ان الله يحب المحسنين/المتوكلين/المقسطين) ف الوقت نفسه اللي بيحثنا نبينا الكريم علي الحب (حب لاخيك ماتحب لنفسك) (تحابو ف الله)، صحيح هو حب من نوع تاني، حب اعظم واسمي وباحساس مختلف بس ف النهاية الحب موجود، خلونا نتفق برضه ان فيه ناس عاشت عمرها كله بتدور عليه، فيه منهم اللي ربنا وفقه ولاقاه، فيه اللي عاش ومات من غير مايقابله وفي اللي لسه لحد دلوقتي بيدور عليه، الفكرة كلها ان الحب ده رزق زيه زي الصحة والمال والبنون، زي الزوجة الصالحة والبصيرة والحكمة وغيرها من نعم الله سبحانه وتعالي التي لا تعد ولا تحصي، بس زي مااحنا عارفين محدش بياخد كل حاجة ف الدنيا، فيه نقطة تانية مهمة بتخلي معظم الناس بتعتقد انها مش قادرة تقابله وهي ان كل واحد بيحب بطريقته، فيه حد بيعبر عن حبه بكلامه وحد تاني بيعبر عنه بتصرفاته والي اخره، المهم انك بتقع ف المطب اياه لما بتحس انك قابلت نصك التاني وتدرك فعلا وتتأكد ان هو ده، ساعتها بتنسي اي مواصفات حلمت بيها ف يوم من الايام، ساعتها ممكن تنسي حتي اسمك، ساعتها هتاخدك هي لعالم تاني، عالمها هي، ساعتها هتلاقي نفسك بتشوف ولاول مرة مواصفات وطباع جديدة غير اللي كنت راسمها ف خيالك ومع ذلك هتقبلها وهتحبها زي ماهي، هتقبل حتي عيوبها قبل مميزاتها، انا شخصيا بتمني انها تكون بسيطة، متواضعة، رقيقة، بتتكلم بصوت واطي، ده لمصلحتك صدقيني عشان لو صوتك علي انا مضمنش نفسي ساعتها ممكن اعمل ايه :) واخيرا اتمني بجد انها تفهمني من نظرة عينيا، كفاية كده بقي والف مبروك للعروسين وعقبال عندكم جميعا
بالنسبة إلى نفسي :بصي ياست الكل، بصيتي؟ باصه بجد؟ انا بتأكد بس، طب تمام، الحقيقة صعب جدا ان الواحد يتكلم عن نفسه عشان كل واحد هيتكلم عن مميزاته فقط ويتجاهل عيوبه، بس بما ان الفرصة سمحتلي اني اتكلم عن نفسي فانا حابب اكون صريح معاكي من البداية واقولك وبمنتهي الامانة اني ارجل وافضل وانسب راجل ممكن تقابليه ف حياتك، انا بجد ملاك ونزل من السما، ف الحقيقة انا كداب جدا علي فكرة وزي ماانتي عارفه الكداب بيروح النار، ولو انتي صدقتي الكلمتين اللي اتقالو فوق دول تبقي ساذجه وتستاهلي انه ينضحك عليكي بسهولة، انتي مفروض تعرفيني الاول وتتعرفي علي شخصيتي كويس وبعدها تقدري تحكمي بنفسك وتحددي انا مين وايه هي مواصفاتي وطباعي، بس كل اللي اقدر اقهولهولك ف الوقت الحالي اني حد بسيط جدا عشت لوحدي لفترة طويلة وبدور علي انسانة تشاركني هذا العالم الافتراضي المؤقت الغير حقيقي بالمرة لحد مانوصل سوا لاخر الرحلة ونلقي وجه الكريم سبحانه وتعالي ومن هناك الي الجنة ان شاء الله قولي آمين، علي صوتك عشان مش سامع، طب تمام، الحقيقة انا بدور علي واحدة تقدر تفهمني من نظرة عينيا، تعرف انا عايز ايه او بفكر ف ايه من قبل حتي مااتكلم، انا عارف انه صعب بس مش مستحيل، وبما ان الانسانة دي مفترض انها ترافقني طوال رحلة عمري فالموضوع يستاهل مني اني ابذل من الوقت والجهد خلال رحلة البحث عنها ايا كانت النتيجة ف الاخر، اتعشم ان حضرتك تكوني لسه بتقري البروفايل بتاعي ومزهقتيش؟ لسه مهتمه تعرفي تفاصيل اكتر؟ طب يله بينا، انا ياستي مسلم مصري وافتخر، تقريبا ٣٦ سنة، هتمهم ف عيد ميلادي الجاي ف شهر ١١ ان شاء الله بس متخفيش مش بدبسك ف هدية ولا حاجة، اشتغلت ف المحاماة اول سنتين بعد التخرج من كلية الحقوق ولكن حاليا اعمل في مجال التسويق لشركات الوساطة المالية ف البورصة وف نفس الوقت بضارب لحسابي الخاص، انا بحب السفر جدا وعشت فترة طويلة بره مصر مابين دول شرق آسيا، بحب التسوق بحب المشي بحب قيادة السيارات، بحب اطبخ جدا بس بزهق اوي من غسيل المواعين، بحب الاعدة قدام البحر خصوصا وقت الغروب، بس بحبك انتي اكتر طبعا من كل دول، انا لسه بدور علي نفسي وحاسس اني مش هلاقيها الا بعد ماالاقي شريكة حياتي الاول، شريكة حياتي ازيك! عاملة ايه من غيري؟ اوعي تقولي احسن، بصي انا مش عارف انتي فين او بتعمل ايه دلوقتي بس كل اللي اقدر اقوله انك وحشتيني, وربنا يسامحني ع الكدب ده، وحشتيني ازاي يعني هو انا اعرفك اصلا؟ اتاخرتي عليا بس عندي ايمان قوي اني هلاقيكي ف يوم من الايام، علي فكرة انا متشفر، يعني لازم يكون معاكي مفاتيحي عشان تقدري تفكي الشفرة دي، وانا من كل قلبي بتمنالك حظ سعيد وانتي بتقومي بالمهمة دي، اخر حاجة حابب اشير اليها قبل مااخلص، انا كنت متزوج من أجنبية ولكن زوجتي توفاها الله بعد سنة واحدة من جوازنا نتيجة مشاكل ف القلب ظهرت فاجأة وربنا يرحمها ويرحمنا جميعا ويحسن خواتمنا، ف الوقت ده سابتلي بنوته عندها شهرين والحمد لله علي كل شيء، الكلام ده حصل من ٥ سنين تقريبا، ومن ساعتها وانا بفضل الله سبحانه وتعالي عشت اب وام لبنتي وانا شايفها بتكبر قدام عيني يوم بعد يوم ربنا يحميها ويحمي اولادنا جميعا، هي دلوقتي عندها ٥ سنين وعايشين سوا انا وهي لوحدينا.
هل ترغب بإرسال رسالة إلى Mostafa4eveR
لن يتم ارسال الرسالة يجب الاشتراك اولا وتسجيل الدخول الي الموقع
Mostafa4eveR